అల్లరి నరేష్ హీరోగా నటిస్తున్న 'మడతకాజా' సినిమా షూటింగు ప్రస్తుతం హైదరాబాదులో జరుగుతోంది. స్నేహ ఉల్లాల్ కథానాయికగా నటిస్తున్న ఈ చిత్రానికి సీతారామరాజు దంతులూరి దర్శకత్వం వహిస్తున్నాడు. ఈ రోజు హైదరాబాదులోని సత్యసాయి నిగమాగంలో ప్రెస్ మీట్ పెట్టి చిత్రం విశేషాలను తెలియజేశారు. ఇందులో తన పాత్ర అందర్నీ నవ్విస్తూ సరదాగా సాగుతుందనీ, అందర్నీ మాటలతో పడకొట్టేస్తూ ఉంటుందనీ హీరో నరేష్ చెప్పాడు. ఇప్పటి వరకు జరిగిన షూటింగుతో ఎనభై శాతం పూర్తయిందనీ, ఈ నెలాఖరుకి టాకీ మొత్తం పూర్తవుతుందనీ దర్శకుడు సీతారామరాజు చెప్పారు. బ్యాంకాక్ లో కూడా కొన్ని సన్నివేశాలు షూట్ చేస్తామని ఆయన చెప్పారు. వచ్చే నెల మొదటి వారంలో ఆడియోను, ఆ తర్వాత సినిమాను రిలీజ్ చేస్తామని నిర్మాత వేదరాజు టింబర్ తెలిపారు.
